काठमाडौं । पतञ्जली योगपीठको जग्गा सट्टापट्टा प्रकरणमा भ्रष्टाचार मुद्दा खेपिरहेका पूर्वप्रधानमन्त्री माधवकुमार नेपालले वारेसमार्फत अदालतको तारेख लिन पाउने भएका छन्।
विशेष अदालतले नेपाललाई आगामी कात्तिक १९ गतेका लागि तोकिएको तारेख वारेसमार्फत बुझ्न अनुमति दिएको हो। विदेशमा एक कार्यक्रममा सहभागी हुन जानुपर्ने कारण देखाउँदै नेपालले अदालतसमक्ष यस्तो अनुमति मागेका थिए।
उनको निवेदनमाथि शुक्रबार विशेष अदालतमा सुनुवाइ भएको थियो। अदालतका अध्यक्ष बासुदेव आचार्य तथा सदस्यद्वय डिल्लीरत्न श्रेष्ठ र उमेश कोइरालाको इजलासले नेपाललाई वारेसमार्फत तारेख लिन अनुमति दिएको हो।
पतञ्जली योगपीठलाई कानुनले निर्धारण गरेको जग्गाको हदबन्दीभन्दा बढी जग्गा सट्टापट्टा गर्न स्वीकृति दिने प्रक्रियामा अनियमितता भएको आरोपमा नेपालविरुद्ध भ्रष्टाचार मुद्दा दायर गरिएको हो।
उक्त मुद्दा दायर भएयता विशेष अदालतमा विचाराधीन अवस्थामा छ। करिब डेढ वर्षदेखि अदालतमा रहेको यस प्रकरणमा नेपालको हकमा भएको पछिल्लो आदेशले विदेश भ्रमणका क्रममा पनि कानुनी प्रक्रियामा उपस्थितिको व्यवस्था सहज बनाएको छ।
वारेसमार्फत तारेख लिन अनुमति पाउनु मुद्दाको अन्तिम फैसला भने होइन। भ्रष्टाचारसम्बन्धी मुद्दाको न्यायिक प्रक्रिया विशेष अदालतमा जारी रहनेछ।
Facebook Comments