काठमाडौं । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले मुलुकको समग्र विकास र राजनीतिक उपलब्धिको संरक्षणका लागि सबै राजनीतिक शक्तिबीच सहकार्य र एकता आवश्यक रहेको बताएका छन्।
पार्टीको केन्द्रीय कार्यालयमा आयोजित कार्यक्रममा बोल्दै प्रचण्डले राजनीतिक परिवर्तनबाट प्राप्त उपलब्धिको रक्षा गर्दै आर्थिक तथा सामाजिक विकासलाई गति दिन राजनीतिक शक्तिहरू एकजुट हुनुपर्ने धारणा राखेका हुन्।
उनले जनताको लामो संघर्षबाट स्थापित राजनीतिक उपलब्धिलाई संस्थागत गर्नुका साथै विपत्तिका समयमा आपसी सहयोग र साझेदारीको भावना बलियो बनाउनुपर्नेमा जोड दिए। छरिएर रहेका कम्युनिष्ट शक्तिहरूलाई पनि एकताबद्ध गर्दै अघि बढ्नुपर्ने उनको भनाइ थियो।
पूर्वप्रधानमन्त्रीसमेत रहेका प्रचण्डले संघीय लोकतान्त्रिक गणतन्त्रका उपलब्धिको रक्षाका लागि पार्टीका नेता तथा कार्यकर्ताहरू प्रतिबद्ध रहनुपर्ने बताए। प्राप्त उपलब्धिमाथि कुनै चुनौती आए त्यसको संरक्षणका लागि आवश्यक त्याग गर्न तयार रहनुपर्ने उनले उल्लेख गरे।
कार्यक्रममा पार्टीका सहसंयोजक माधवकुमार नेपालले सामाजिक विभेद अन्त्य नगरी समृद्ध नेपालको लक्ष्य हासिल गर्न नसकिने धारणा राखे। समाजमा विद्यमान असमानता र विभेद हटाउँदै सबै नागरिकले समान अवसर पाउने वातावरण निर्माण गर्नुपर्ने उनको भनाइ थियो।
नेताहरूले राजनीतिक उपलब्धिको संरक्षण, सामाजिक न्याय र आर्थिक विकासलाई अघि बढाउन राजनीतिक शक्तिबीच सहकार्य आवश्यक रहेको बताएका छन्।
Facebook Comments