काठमाडौं । नेपाली कांग्रेसको १५औँ महाधिवेशनअन्तर्गत पदाधिकारी चयनका लागि भइरहेको मतगणनामा उपसभापतिको खुलातर्फ डा. चन्द्रकान्त भण्डारी तथा महामन्त्रीको खुला र महिला समूहमा क्रमशः प्रदीप पौडेल र डा. डिला संग्रौला (पन्त) ले अग्रता कायम गरेका छन्।

४ हजार ६०० मत गणना हुँदासम्म सार्वजनिक भएको परिणामअनुसार उपसभापतिको खुला प्रतिस्पर्धामा भण्डारीले २ हजार ३४३ मत प्राप्त गरेका छन्। उनका प्रतिस्पर्धी ई. मधु आचार्यले १ हजार ४४१ मत पाउँदा गोविन्द भट्टराईले १ हजार २१९ र सुरेन्द्रराज पाण्डेले १ हजार १५० मत प्राप्त गरेका छन्।

ad

त्यस्तै, धनराज गुरुङले १ हजार ५३, दीपक गिरीले ६३८ र प्रा. डा. चन्द्रमोहन यादवले ३८७ मत पाएका छन्।
उपसभापतिको समावेशी पदमा विनोद चौधरी अगाडि
उपसभापतिको समावेशी समूहअन्तर्गत एक पदका लागि भएको प्रतिस्पर्धामा विनोदकुमार चौधरीले अग्रता लिएका छन्। उनले १ हजार १४५ मत प्राप्त गर्दा जीवन परियारले १ हजार १०७ मत पाएका छन्।

यसैगरी, सीता गुरुङले ७४९, फरमुल्लाह मंसुरले ६३७ र रञ्जित कर्णले ३५२ मत प्राप्त गरेका छन्।

चौधरी र परियारबीचको मतान्तर तुलनात्मक रूपमा कम रहेकाले आगामी गणनामा परिणाममा फेरबदल हुन सक्ने देखिन्छ।

महामन्त्रीको खुलातर्फ प्रदीप पौडेलको अग्रता

महामन्त्रीको खुला पदमा प्रदीप पौडेलले अन्य 
उम्मेदवारलाई पछि पार्दै अग्रता बनाएका छन्। गणना भएको मतमध्ये उनले २ हजार ६५७ मत प्राप्त गरेका छन्।
उनका प्रतिस्पर्धी उदयशमशेर राणाले १ हजार ४९१ र डा. सुनिलकुमार शर्माले १ हजार ३८७ मत पाएका छन्। अमरसिंह पुन मगरले ९२९, गुरुराज घिमिरेले ९२०, नैनसिंह महरले ६६८ र शंकर तिवारीले ८८ मत प्राप्त गरेका छन्।
पौडेलले निकटतम प्रतिस्पर्धी राणासँगको मतान्तर बढाउँदै अग्रता कायम गरेका छन्।

महिला महामन्त्रीमा डिला संग्रौला अगाडि

महामन्त्रीको महिला समूहमा डा. डिला संग्रौला (पन्त) ले अग्रता लिएकी छन्। एक पदका लागि भइरहेको प्रतिस्पर्धामा उनले २ हजार ३७ मत प्राप्त गरेकी छन्।

उनकी प्रतिस्पर्धी महालक्ष्मी उपाध्याय (डिना) ले १ हजार ८३८ मत पाउँदा रीता खनालले ४६६ मत प्राप्त गरेकी छन्।
संग्रौला र उपाध्यायबीचको प्रतिस्पर्धा पनि महत्वपूर्ण देखिएको छ। अन्तिम परिणामका लागि बाँकी मतगणना सम्पन्न हुनुपर्नेछ।

कांग्रेसको १५औँ महाधिवेशनबाट नयाँ नेतृत्व चयन गर्न जारी मतगणनामा विभिन्न पदका उम्मेदवारबीच प्रतिस्पर्धा चलिरहेको छ। हालसम्मको परिणामले केही उम्मेदवारलाई अग्रस्थानमा देखाए पनि अन्तिम नतिजा भने सम्पूर्ण मतगणना सकिएपछि मात्रै निश्चित हुनेछ।