काठमाडौं । सरकारले भूकम्पीय जोखिमबाट उत्पन्न हुन सक्ने क्षति व्यवस्थापन, बिटौरी जग्गा दर्ता प्रक्रिया अघि बढाउने तथा एसियाली खेलकुदमा पदक जित्ने खेलाडीलाई नगद पुरस्कार दिने निर्णय गरेको छ।
प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद् बैठकले विश्व बैंकसँग भूकम्पीय जोखिमसम्बन्धी विपद् ऋणपत्र जारी गर्ने प्रक्रियासँग जोडिएको सम्झौतामा हस्ताक्षर गर्न स्वीकृति दिने निर्णय गरेको हो।
सूचना तथा सञ्चारमन्त्री डा. विक्रम तिमिल्सिनाका अनुसार बैठकले नेपाल अर्थक्वेक क्याटास्ट्रोफ बन्डसम्बन्धी म्यान्डेट एग्रिमेन्टमा हस्ताक्षर गर्ने अनुमति दिएको छ। उक्त व्यवस्थाले भूकम्पीय विपद्को जोखिम व्यवस्थापनका लागि आवश्यक वित्तीय तयारीमा सहयोग पुर्याउने अपेक्षा गरिएको छ।
बैठकले लामो समयदेखि बिटौरी जग्गामा बसोबास गर्दै आएका व्यक्तिका नाममा जग्गा दर्ता गर्ने विषयलाई अघि बढाउन ‘समिति गठन आदेश, २०८३’ समेत स्वीकृत गरेको छ। यस निर्णयसँगै बिटौरी जग्गाको दर्तासम्बन्धी प्रक्रिया अगाडि बढाउन आवश्यक संस्थागत व्यवस्था गर्ने बाटो खुलेको छ।
खेलकुद क्षेत्रलाई प्रोत्साहन गर्ने उद्देश्यले जापानको आइची–नागोयामा आयोजित २०औँ एसियाली खेलकुद प्रतियोगितामा पदक जित्ने महिला कबड्डी तथा कराँतेका खेलाडीलाई नगद पुरस्कार प्रदान गर्ने निर्णय पनि बैठकले गरेको छ। प्रतियोगितामा योगदान पुर्याएका प्रशिक्षक र व्यवस्थापकलाई समेत पुरस्कार दिने निर्णय भएको मन्त्री तिमिल्सिनाले जानकारी दिएका छन्।
यसैगरी, मन्त्रिपरिषद्ले नेपाल न्याय सेवाअन्तर्गत सरकारी वकिल समूहका सहन्यायाधिवक्ता अच्युतमणि नेउपानेलाई राजपत्राङ्कित विशिष्ट श्रेणीमा बढुवा गर्ने निर्णय गरेको छ। बढुवापछि उनलाई बेपत्ता पारिएका व्यक्तिको छानबिन आयोगको सचिव पदमा पदस्थापन गरिने भएको छ।
बैठकका यी निर्णयले विपद् जोखिम व्यवस्थापन, जग्गा दर्ता, खेलाडीको सम्मान तथा सार्वजनिक प्रशासनमा पदस्थापनसम्बन्धी विषयलाई समेटेका छन्।
Facebook Comments