काठमाडौं । नेपाली कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले गणतन्त्र स्थापनापछि मुलुकमा कुनै उपलब्धि हासिल नभएको भन्ने दाबी तथ्य र इतिहाससँग मेल नखाने बताएका छन् ।
शनिबार काभ्रे जिल्ला एकता बैठकलाई सम्बोधन गर्दै प्रचण्डले राजनीतिक परिवर्तनदेखि विकास निर्माणसम्मका उपलब्धिको वस्तुनिष्ठ समीक्षा आवश्यक रहेको बताए । उनले कमजोरीलाई स्वीकार गर्दै गणतन्त्रपछि भएका परिवर्तन र उपलब्धिलाई तथ्यका आधारमा जनतासामु प्रस्तुत गर्नुपर्ने धारणा राखे ।
प्रचण्डले गणतन्त्र स्थापनालाई सामान्य राजनीतिक परिवर्तनका रूपमा मात्र लिन नहुने बताए । उनका अनुसार सामन्ती राजतन्त्रबाट संघीय लोकतान्त्रिक गणतन्त्रमा मुलुकलाई रूपान्तरण गर्ने प्रक्रियामा आफूहरूले महत्वपूर्ण भूमिका निर्वाह गरेका छन् ।
‘गणतन्त्र आएपछि केही पनि भएन भन्ने कुरा इतिहास र तथ्यसँग मेल खाँदैन,’ प्रचण्डले भने, ‘सामन्ती राजतन्त्रबाट संघीय लोकतान्त्रिक गणतन्त्रमा देशलाई रूपान्तरण गर्ने राजनीतिक प्रक्रियामा हामीले महत्वपूर्ण भूमिका खेलेका छौँ ।’
उनले गणतन्त्रपछिका उपलब्धिको समीक्षा गर्दा राजनीतिक परिवर्तनसँगै त्यसपछि भएका संस्थागत तथा विकासका कामलाई पनि आधार बनाउनुपर्ने बताए । उपलब्धिको चर्चा गर्दा अतिरञ्जना नगर्न र कमजोरीको मूल्याङ्कन गर्दा भएका परिवर्तनलाई समेत नजरअन्दाज नगर्न उनले आग्रह गरे ।
पूर्वप्रधानमन्त्री प्रचण्डले आफ्नो नेतृत्वमा सरकारमा रहँदा भएका कामको पनि तथ्यका आधारमा मूल्याङ्कन गर्नुपर्ने बताए । विशेषगरी आफ्नो पहिलो प्रधानमन्त्री कार्यकालका राजनीतिक उपलब्धिलाई उनले शान्ति प्रक्रिया, गणतन्त्रको कार्यान्वयन र संविधान निर्माणको आधार निर्माणसँग जोडेर व्याख्या गरे ।
उनका अनुसार पहिलो कार्यकालमा शान्ति प्रक्रियालाई संस्थागत गर्ने तथा गणतन्त्रलाई व्यवहारमा कार्यान्वयन गर्ने काम अघि बढेको थियो । त्यसैगरी संविधान निर्माणका लागि आवश्यक राजनीतिक वातावरण तयार पार्ने काम पनि महत्वपूर्ण रहेको उनको भनाइ थियो ।
प्रचण्डले गणतन्त्रपछि भएका सकारात्मक परिवर्तनलाई कमजोर पार्ने गरी तयार गरिने कुनै पनि भाष्य दीर्घकालीन रूपमा टिक्न नसक्ने दाबी गरे । बरु भएका उपलब्धि र कमजोरी दुवैको तथ्यपरक समीक्षा गरेर आगामी राजनीतिक तथा सामाजिक दिशाबारे बहस गर्नुपर्ने उनको भनाइ थियो ।
काभ्रेमा आयोजित जिल्ला एकता बैठकमा उनले पार्टी संगठन सुदृढीकरण र राजनीतिक गतिविधिलाई प्रभावकारी बनाउने विषयमा पनि धारणा राखेका थिए । पछिल्लो राजनीतिक परिस्थितिमा जनतासँगको सम्बन्ध बलियो बनाउन तथा आफ्ना राजनीतिक एजेन्डालाई स्पष्ट रूपमा अघि बढाउनुपर्नेमा उनले जोड दिए ।
प्रचण्डको अभिव्यक्ति गणतन्त्र स्थापनापछि मुलुकले हासिल गरेका उपलब्धि र त्यस अवधिका कमजोरीबारे सार्वजनिक बहस भइरहेका बेला आएको हो । उनले उपलब्धिको दाबी मात्र गर्नेभन्दा पनि त्यसको वस्तुनिष्ठ समीक्षा गर्दै तथ्यका आधारमा राजनीतिक निष्कर्ष निकाल्नुपर्नेमा जोड दिएका छन् ।
Facebook Comments