काठमाडौं । नेपाली कांग्रेसमा महाधिवेशनलाई लिएर देखिएको विवाद समाधान गर्न संस्थापन पक्षले लचकता देखाए पनि पूर्वसभापति शेरबहादुर देउवा पक्ष तत्काल सहमत हुने अवस्थामा पुगेको छैन।
सोमबार बिहान बसेको देउवा पक्षका शीर्ष नेताहरूको छलफलले संस्थापन पक्षले अघि सारेको महाधिवेशनसम्बन्धी निर्णय स्वीकार गर्न नसकिने निष्कर्ष निकालेको नेता एनपी साउदले जानकारी दिए। उनका अनुसार महाधिवेशनको निर्धारित तालिका यथावत् राखेर गरिएको निर्णयप्रति देउवा पक्षको असहमति कायमै छ।
यसअघि आइतबार बसेको कांग्रेस केन्द्रीय कार्यसम्पादन समितिको बैठकले १४औँ महाधिवेशनबाट निर्वाचित केन्द्रीय कार्यसमितिका सबै सदस्यलाई आगामी महाधिवेशनमा सहभागी हुने व्यवस्था विधानअनुसार मिलाउने निर्णय गरेको थियो। संस्थापन पक्षले उक्त निर्णयलाई पार्टीभित्रका असहमति र चासोलाई संवाद तथा सहमतिमार्फत सम्बोधन गर्ने प्रयासका रूपमा व्याख्या गरेको छ।
महामन्त्री प्रदीप पौडेलले महाधिवेशनमा कुनै पनि पक्ष वा नेता छुट्न नदिने उद्देश्यले संवादलाई निरन्तरता दिने र आवश्यक विषय सहमतिमार्फत टुंग्याउने प्रयास भइरहेको बताएका छन्।
देउवा पक्षले गत साउन २९ गतेदेखि तीनदिने राष्ट्रिय सम्मेलन आयोजना गरेपछि संस्थापन इतर समूहले छुट्टै १५औँ महाधिवेशन गर्ने घोषणा गरेको थियो। उक्त समूहले आगामी मंसिर २१ देखि २३ गतेसम्म काठमाडौंमा महाधिवेशन गर्ने निर्णय गरेको छ।
उता, संस्थापन पक्षले यसअघि नै १५औँ महाधिवेशन असोज १६ देखि १९ गतेसम्म काठमाडौंमा गर्ने कार्यतालिका तय गरिसकेको छ। यसरी कांग्रेसभित्र एउटै महाधिवेशनका लागि दुई छुट्टाछुट्टै मिति अघि सारिएका छन्।
Facebook Comments