काठमाडौं । शुक्रबारदेखि जारी वर्षा कम भएसँगै शनिबार दिउँसोदेखि काठमाडौं उपत्यकासहित देशका विभिन्न स्थानमा मौसममा सुधार देखिन थालेको छ। वर्षाका कारण प्रभावित बनेको जनजीवन पनि क्रमशः सामान्य अवस्थामा फर्किन थालेको छ।
भारतको बङ्गालको खाडीमा विकसित चक्रवात ‘अर्नब’को प्रभावका कारण शुक्रबारदेखि देशका अधिकांश भूभागमा वर्षा भएको थियो। निरन्तरको वर्षाले सडक, बजार तथा सार्वजनिक स्थानमा आवागमन प्रभावित हुनुका साथै सर्वसाधारणको दैनिक गतिविधिमा समेत असर पारेको थियो।
शनिबार बिहानसम्म वर्षा जारी रहे पनि दिउँसोबाट वर्षाको क्रम घट्दै गएको हो। काठमाडौं उपत्यकामा आकाश खुल्न थालेपछि सर्वसाधारणले केही राहत महसुस गरेका छन्।
वर्षा रोकिएसँगै सडकमा सवारीसाधनको चाप बढेको छ भने बजार तथा सार्वजनिक स्थलमा पनि मानिसहरूको आवतजावत र चहलपहल बढ्न थालेको छ। वर्षाका कारण जलमग्न भएका सडक तथा बस्तीमा समेत पानीको सतह घट्दै गएपछि जनजीवन सहज बन्दै गएको छ।
लगातारको वर्षाले प्रभावित भएको यातायात र बजार क्षेत्र मौसममा सुधार आएसँगै पुनः चलायमान हुन थालेका छन्।
यद्यपि मौसममा देखिएको सुधारसँगै तत्कालै सबै स्थानको अवस्था सामान्य भइसकेको निष्कर्ष निकाल्न सकिने अवस्था छैन। वर्षाका कारण प्रभावित क्षेत्रका बासिन्दाले सतर्कता अपनाउनु आवश्यक देखिएको छ।
Facebook Comments