काठमाडौँ । गैरआवासीय नेपाली संघ (एनआरएनए) का पूर्वउपाध्यक्ष सुनील साहले गत २६ अगस्ट अर्थात भदौ १० गते बुधवार रसुवाको भोटेकोशी नदीमा आएको विनाशकारी बाढीबाट प्रभावितका लागि राहत तथा उद्धारमा हातेमालो गर्न संसारभर छरिएर रहेका नेपालीलाई अपिल गरेका छन्।
सामाजिक सञ्जाल फेसबुकमार्फत आफ्नो धारणा सार्वजनिक गर्दै पूर्वउपाध्यक्ष साहले बाढीका कारण ठूलो जनधनको क्षति भएको, धेरैले ज्यान गुमाएको र हजारौँ परिवार प्रभावित भएको भन्दै दुःख व्यक्त गरेका छन्। विदेशमा रहे पनि मातृभूमिसँगको नाता र जिम्मेवारी सधैँ कायम रहने उल्लेख गर्दै उनले विपत्तिको यो समयमा नेपाललाई सबैको साथ, सहयोग र सद्भावको आवश्यकता रहेको बताएका छन्।
आफ्नो क्षमता र इच्छाअनुसार सहयोग गर्न आह्वान गर्दै साहले सानो योगदानले पनि पीडित परिवारका लागि ठूलो सहारा पुग्ने विश्वास व्यक्त गरेका छन्। सहयोग रकमलाई पारदर्शी र सही ठाउँमा पुर्याउनका लागि नेपाल सरकारको ‘एकद्वार प्रणाली’ नीतिअन्तर्गत सिधै प्रधानमन्त्री दैवी प्रकोप उद्धार कोषमा जम्मा गर्ने गरी सहजीकरण गर्न उनले सबैमा आग्रह गरेका छन्। त्यसका लागि उनले सरकारको आधिकारिक QR Code समेत आफ्नो सामाजिक सञ्जालमार्फत शेयर गरेका छन्।
Facebook Comments