काठमाडौं । प्रधानन्यायाधीश डा. मनोजकुमार शर्माले सम्पत्ति शुद्धीकरणसम्बन्धी कसुरमा प्रहरी हिरासतमा रहेका इनम सापकोटासँग आफ्नो कुनै पनि प्रकारको चिनजान वा सम्पर्क नरहेको स्पष्ट पारेका छन्।
सापकोटासँग सम्बन्धित प्रसङ्गमा आफ्नो नाम जोडेर समाचार प्रकाशित भएपछि शर्माले बिहीबार विज्ञप्ति जारी गर्दै त्यसको खण्डन गरेका हुन्। उनले समाचारमा उल्लेख गरिएका व्यक्ति र घटनासँग आफ्नो कुनै संलग्नता नरहेको दाबी गरेका छन्।
शर्माले आफूले सापकोटालाई प्रत्यक्ष वा परोक्ष रूपमा नचिनेको र उनीसँग कहिल्यै भेटघाटसमेत नभएको बताएका छन्। आफ्नो नाम जोडेर सार्वजनिक गरिएका विवरण तथ्यहीन रहेको उनको भनाइ छ।
विज्ञप्तिमा उनले लेखेका छन्, ‘जुन प्रसङ्ग जोडी मेरो नाम उल्लेख गरिएको छ, ती व्यक्तिहरू एवं प्रसङ्गमा मेरो कुनै संलग्नता छैन। ती व्यक्तिहरूसँग मेरो प्रत्यक्ष एवं परोक्ष रूपमा चिनजान, सम्पर्कसमेत छैन। मैले कहिँकतै भेटेको पनि छैन।’
प्रधानन्यायाधीश नियुक्तिको समयलाई लिएर प्रश्न
समाचारमा उल्लेख गरिएको समयावधिमाथि प्रश्न उठाउँदै शर्माले नोभेम्बर, डिसेम्बर र जनवरी महिनामा आफू प्रधानन्यायाधीशको जिम्मेवारीमा नरहेको बताएका छन्। त्यसैले उक्त अवधिसँग जोडेर आफ्नो नाम उल्लेख गर्नु उचित नभएको उनको आशय छ।
उनले आफूविरुद्ध आधारहीन, झुटा र कपोलकल्पित विवरण सार्वजनिक गरिएको आरोप लगाउँदै त्यस्ता समाचारप्रति आपत्ति जनाएका छन्। जनतामा भ्रम सिर्जना गर्ने उद्देश्यले समाचार प्रकाशित गरिएको भन्दै उनले त्यसको भर्त्सनासमेत गरेका छन्।
सापकोटा प्रकरणमा विभिन्न व्यक्तिको नाम जोडिँदै
सम्पत्ति शुद्धीकरणसम्बन्धी कसुरमा प्रहरी हिरासतमा रहेका सापकोटाको नाम न्यायालयमा विचाराधीन मुद्दालाई प्रभावित पार्न खोजेको आरोपसँग समेत जोडिएको छ। पछिल्लो समय यस प्रकरणमा विभिन्न उच्चपदस्थ व्यक्तिको नाम सार्वजनिक चर्चामा आउन थालेपछि सम्बन्धित व्यक्तिहरूका धारणा पनि सार्वजनिक भइरहेका छन्।
प्रधानन्यायाधीश शर्माले भने सापकोटासँग आफ्नो कुनै सम्बन्ध नरहेको दाबी गर्दै समाचारमा उल्लेख गरिएका प्रसङ्गबाट आफू पूर्णतः असम्बन्धित रहेको स्पष्ट पारेका छन्। यस विषयमा सार्वजनिक भएका आरोप र दाबीको आधिकारिक पुष्टि भने सम्बन्धित प्रमाण तथा अनुसन्धानबाट स्थापित हुनुपर्नेछ।
Facebook Comments