काठमाडौं । नेपाली कांग्रेसका वरिष्ठ उपसभापति विश्वप्रकाश शर्माले आगामी दशकलाई सामाजिक रूपान्तरणको दशकका रूपमा विकास गर्न पार्टीले प्राथमिकताका साथ काम गर्नुपर्ने बताएका छन्। समाजमा विद्यमान विभेद र विकृति अन्त्य गर्दै परिवर्तनको अभियान अघि बढाउन उनले पार्टी नेतृत्व तथा नवनिर्वाचित पदाधिकारीहरूलाई आग्रह गरेका छन्।
पार्टी केन्द्रीय कार्यालय सानेपामा आयोजित १५औँ महाधिवेशनबाट निर्वाचित पदाधिकारी तथा केन्द्रीय सदस्यहरूको शपथग्रहण समारोहलाई सम्बोधन गर्दै शर्माले सामाजिक परिवर्तनलाई पार्टीको प्रमुख कार्यदिशाका रूपमा अघि बढाउनुपर्ने धारणा राखेका हुन्।
उनले नवनिर्वाचित केन्द्रीय सदस्यहरूलाई जिम्मेवारीअनुसार परिणाम देखिने गरी काम गर्न पनि आग्रह गरे। पार्टी केन्द्रको नीति र सभापतिको कार्ययोजनालाई प्रभावकारी रूपमा कार्यान्वयन गर्न सके मात्रै जनतामाझ सकारात्मक सन्देश प्रवाह हुने उनको भनाइ थियो।
सामाजिक सञ्जाललाई रूपान्तरणको माध्यम बनाउनुपर्ने
डिजिटल प्रविधिको बढ्दो प्रभावबारे चर्चा गर्दै शर्माले सामाजिक सञ्जालको प्रयोग जिम्मेवार ढङ्गले गर्नुपर्नेमा जोड दिए। गलत सूचना र भ्रामक प्रचारको प्रतिवाद तथ्य तथा विधिसम्मत प्रक्रियाबाट गर्नुपर्ने उल्लेख गर्दै उनले सामाजिक सञ्जाललाई द्वेष फैलाउने माध्यम नभई सामाजिक चेतना अभिवृद्धि र रूपान्तरणको साधन बनाउनुपर्ने बताए।
उनका अनुसार समाजमा सकारात्मक परिवर्तन ल्याउन राजनीतिक दलहरूले पनि डिजिटल माध्यमको उपयोगलाई रचनात्मक दिशामा अघि बढाउन आवश्यक छ।
राष्ट्रिय मुद्दामा सरकारसँग सहकार्य गर्ने प्रतिबद्धता
शर्माले पार्टीगत स्वार्थभन्दा राष्ट्रहितलाई प्राथमिकतामा राख्नुपर्ने धारणा राखे। जलवायु परिवर्तनका असर न्यूनीकरण, हिमाल संरक्षण तथा विदेशमा रहेका नेपालीका समस्या र भावनालाई सम्बोधन गर्ने विषयमा कांग्रेस सरकारसँग सहकार्य गर्न तयार रहेको उनले स्पष्ट पारे।
राष्ट्रिय महत्त्वका विषयमा राजनीतिक दलहरूबीच सहकार्य आवश्यक रहेको उल्लेख गर्दै उनले सामाजिक रूपान्तरणसँगै वातावरण संरक्षण र प्रवासी नेपालीका सरोकारलाई पनि प्राथमिकतामा राख्नुपर्ने बताए।
शर्माको सम्बोधनमा पार्टीभित्रको जिम्मेवारीलाई परिणाममुखी बनाउने, सामाजिक विभेद र विकृति अन्त्य गर्ने तथा राष्ट्रिय मुद्दामा सहकार्य गर्ने विषयले प्रमुख स्थान पाएको थियो।
Facebook Comments