काठमाडौं । नेपाल चिकित्सक संघले वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको आक्रमण र अस्पतालमा भएको तोडफोडको घटनामा संलग्न दोषीमाथि कानुनी कारबाही नभएको भन्दै देशव्यापी आन्दोलनका कार्यक्रम घोषणा गरेको छ ।
संघले मंगलबार प्रेस विज्ञप्ति जारी गर्दै देशभरका अस्पतालमा आकस्मिक सेवाबाहेकका सबै सेवा बन्द गरिने जनाएको हो ।
संघले घटना भएको चार दिन बितिसक्दा पनि दोषीविरुद्ध मुद्दा दायर गरी कारबाही नगरिएको, पीडित चिकित्सक तथा स्वास्थ्यकर्मीमाथि अन्याय भएको तथा वार्तामा सहभागी चिकित्सकमाथि पर्साका प्रमुख जिल्ला अधिकारी र प्रहरी प्रमुखबाट दुव्र्यवहार भएको उल्लेख गरेको छ ।
संघका अनुसार केन्द्रीय कार्यालयमा पूर्व अध्यक्ष, पूर्व महासचिव, वरिष्ठ चिकित्सक, अस्पताल निर्देशक, विशेषज्ञ समाज, आवासीय चिकित्सक तथा अन्य स्वास्थ्यकर्मीहरूसँग भएको छलफल र केन्द्रीय कार्यकारिणी समितिको आकस्मिक बैठकपछि आन्दोलनका कार्यक्रम तय गरिएको हो ।
घोषित कार्यक्रमअनुसार आज देशभरका अस्पतालमा आकस्मिक सेवाबाहेकका सबै सेवा बन्द गरिनेछ । काठमाडौं उपत्यकाभित्रका चिकित्सक तथा स्वास्थ्यकर्मी बिहान १० बजे माइतीघर मण्डलामा भेला भएर विरोध प्रदर्शन गर्नेछन् भने उपत्यकाबाहिर सम्बन्धित जिल्ला प्रशासन कार्यालयमा ज्ञापनपत्र बुझाउनुका साथै आ–आफ्नो कार्यस्थलमा धर्ना र विरोध प्रदर्शन गरिने संघले जनाएको छ ।
Facebook Comments