फिफा विश्वकप २०२६ अन्तर्गत अन्तिम १६ को निकै रोमाञ्चक र तनावपूर्ण खेलमा आयोजक मेक्सिकोलाई ३–२ ले पराजित गर्दै इङ्गल्याण्ड क्वार्टरफाइनलमा प्रवेश गरेको छ । मेक्सिको सिटीस्थित प्रसिद्ध एज्टेका स्टेडियमको प्रतिकूल वातावरण र दोस्रो हाफमा आफ्ना एक खेलाडीले रातो कार्ड पाएर मैदान छाड्नुपरे पनि इङ्गल्याण्डले उत्कृष्ट प्रदर्शन गर्दै जित निकाल्यो ।
खराब मौसमका कारण झण्डै एक घण्टा खेल अवरुद्ध भएको खेललाई जारी विश्वकपको अहिलेसम्मकै उत्कृष्ट खेलहरूमध्ये एक मानिएको छ। सन् १९६६ यता पहिलो पटक विश्वकप उपाधि जित्ने दाउमा रहेको इङ्गल्याण्ड लगातार तेस्रो पटक क्वार्टरफाइनलमा पुग्न सफल भएको हो। अब इङ्गल्याण्डले सेमिफाइनल प्रवेशका लागि शनिबार मायामी गार्डेन्समा एर्लिङ हालान्डको नेतृत्वमा रहेको नर्वेको सामना गर्नेछ।
खेलको पहिलो हाफमा जुड बेलिङ्घमले ३६औँ र ३८औँ मिनेटमा लगातार दुई गोल गर्दै इङ्गल्याण्डलाई बलियो स्थितिमा पुर्याएका थिए। तर, ४२औँ मिनेटमा मेक्सिकोका जुलियन क्विनोनेसले गोल गर्दै गोलअन्तर कम गरेपछि घरेलु समर्थकहरूमा उत्साह थपिएको थियो। खेलको ५४औँ मिनेटमा इङ्गल्याण्डका डिफेन्डर जरेल क्वान्साले मेक्सिकोका जेसस गालार्डोमाथि गरेको फाउललाई भिडियो असिस्टेन्ट रेफ्री (VAR) ले सोझै रातो कार्डको सजाय दिएपछि इङ्गल्याण्ड २–१ को स्थितिमा १० खेलाडीमा सीमित भयो।
क्वान्सा विश्वकप इतिहासमा रातो कार्ड पाउने चौथो इङ्गल्याण्डका खेलाडी बनेका छन्। यसअघि वेन रुनी (२००६), डेभिड बेकहम (१९९८) र रे विल्किन्स (१९८६) ले मात्र विश्वकपमा रातो कार्ड पाएका थिए।
१० खेलाडीमा समेटिएपछि इङ्गल्याण्डका मुख्य प्रशिक्षक थॉमस टुचेलले आक्रामक खेलाडी बुकायो साकालाई निकालेर डिफेन्डर जोन स्टोन्सलाई मैदान पठाउँदै रक्षापङ्क्ति बलियो बनाएका थिए। रक्षात्मक रूपमा खेले पनि इङ्गल्याण्डले ६०औँ मिनेटमा अग्रतालाई ३–१ मा पुर्यायो।
मेक्सिकोका गोलकिपर राउल रान्जेलले एन्थोनी गोर्डनलाई पेनाल्टी बक्सभित्र फाउल गरेपछि पाएको पेनाल्टीलाई कप्तान ह्यारी केनले गोलमा परिणत गरे। खेलको ६९औँ मिनेटमा मेक्सिकोका लागि राउल जिमेनेजले पेनाल्टीमार्फत गोल गर्दै खेललाई ३–२ को स्थितिमा ल्याए।
दोस्रो हाफको लामो समय एक खेलाडी बढी हुनुको फाइदा उठाए पनि मेक्सिकोले इङ्गल्याण्डको दरो रक्षापङ्क्ति तोड्न सकेन र घरेलु मैदानमै उसको विश्वकप यात्रा समाप्त भयो। सन् १९८६ मा क्वार्टरफाइनल पुगेयता मेक्सिको विश्वकपको अन्तिम १६ को चरणबाट बाहिरिएको यो आठौँ पटक हो।
Facebook Comments