काठमाडौं । देशका विभिन्न स्थानमा पछिल्लो २४ घण्टामा भएका सवारी दुर्घटनामा पाँच जनाको मृत्यु भएको छ भने ३१३ जना घाइते भएका छन्। काठमाडौं, सुनसरी, मकवानपुर, मोरङ र तनहुँमा भएका दुर्घटनामा पाँच जनाले ज्यान गुमाएका हुन्।
प्रहरी प्रधान कार्यालयका अनुसार काठमाडौंको टेकुस्थित अम्बे कम्प्लेक्स नजिक मोटरसाइकलको ठक्करबाट भारतीय नागरिक ४५ वर्षीय परमानन्द बैठाको मृत्यु भएको छ। त्रिपुरेश्वरबाट कालीमाटीतर्फ जाँदै गरेको बा.प्र. ०२–०६३ प ९०९६ नम्बरको मोटरसाइकलले ठक्कर दिँदा घाइते भएका बैठाको त्रिवि शिक्षण अस्पताल, महाराजगन्जमा उपचारका क्रममा मृत्यु भएको प्रहरीले जनाएको छ।
सुनसरीको इटहरी उपमहानगरपालिका–४ हलगडास्थित कोशी लोकमार्गमा बसको ठक्करबाट मोटरसाइकल चालकको मृत्यु भएको छ। को.२७ प २०३६ नम्बरको मोटरसाइकललाई प्र.१–०२–००१ ख ९९८५ नम्बरको बसले ठक्कर दिँदा इटहरी–८ निवासी ६२ वर्षीय छत्रबहादुर भण्डारीको मृत्यु भएको हो।
मकवानपुरको बकैया गाउँपालिका–५ श्रीपुरमा अटो दुर्घटना हुँदा ४५ वर्षीय सन्तबहादुर माझीले ज्यान गुमाएका छन्। बा.प्र. ०८–००१ ह ०१०५ नम्बरको अटोको ब्रेक फेल भएर दुर्घटना भएको प्रारम्भिक विवरणमा उल्लेख छ।
मोरङको लेटाङ नगरपालिका–५ डिल्लेचोकस्थित भित्री सडकमा मोटरसाइकलको ठक्करबाट ७० वर्षीय बलबहादुर विकको मृत्यु भएको छ। प्र.१–०१–२४५ प ६३८० नम्बरको मोटरसाइकलले ठक्कर दिँदा गम्भीर घाइते भएका विकको मृत्यु भएको प्रहरीले जनाएको छ।
त्यसैगरी, तनहुँको व्यास नगरपालिका–१ अम्रेनीस्थित पृथ्वीराजमार्गमा सवारीसाधनको ठक्करबाट करिब ४० वर्षीय एक पुरुषको मृत्यु भएको छ। डुम्रेबाट दमौलीतर्फ जाँदै गरेको बा.१८ च ४५८७ नम्बरको गाडीले ठक्कर दिँदा ती पुरुषको मृत्यु भएको प्रहरीले जनाएको छ। मृतकको पहिचान खुल्न सकेको छैन।
पछिल्लो २४ घण्टामा देशभर ३१३ जना घाइते हुनुले पनि सवारी दुर्घटनाबाट हुने मानवीय क्षतिको अवस्था गम्भीर रहेको देखाएको छ। सडकमा यात्रा गर्दा सावधानी अपनाउने, सवारीसाधनको अवस्था जाँच गर्ने र ट्राफिक नियम पालना गर्ने विषय सडक सुरक्षा कायम गर्न महत्त्वपूर्ण छन्।
Facebook Comments