काठमाडौं । दशैं मनाउन गाउँघर गएकाहरू राजधानी फर्किन थालेपछि काठमाडौं उपत्यकामा चहलपहल बढ्न थालेको छ। केही दिनयता सुनसान देखिएका सडकमा सवारीसाधनको आवागमन बढेको छ भने बजार र बस्तीमा पनि जनजीवन सामान्य बन्दै गएको छ।
दशैंअघि उपत्यकाबाट ठूलो सङ्ख्यामा मानिस बाहिरिएपछि काठमाडौंका मुख्य सडक, बजार र सार्वजनिक स्थलमा चहलपहल घटेको थियो। सार्वजनिक सवारीसाधनमा यात्रुको चाप कम हुनुका साथै दैनिक व्यस्त रहने सडकसमेत खाली देखिएका थिए। तर, दशैंको टीका सुरु भएसँगै गाउँबाट राजधानी फर्किने र आफन्तकहाँ आउजाउ गर्ने क्रम बढेपछि सहरमा पुनः रौनक देखिन थालेको छ।
बुधबार विजयादशमीदेखि सुरु भएको टीका लगाउने क्रम बिहीबार एकादशीमा पनि जारी छ। पारिवारिक परम्परा र चलनअनुसार कतिपयले कोजाग्रत पूर्णिमासम्म मान्यजनबाट टीका, जमरा र आशीर्वाद लिने गर्छन्। टीका लगाएपछि केही मानिस राजधानी फर्किसकेका छन् भने अन्यले फर्किने तयारी गरिरहेका छन्।
उपत्यकाका रिङरोडसहित विभिन्न मुख्य सडकमा मोटरसाइकल, निजी कार र अन्य सवारीसाधनको आवागमन बढ्न थालेको छ। दशैं बिदामा गाउँ गएका मानिस काममा फर्किने क्रमसँगै सहरको दैनिक गतिविधि पनि पुरानै लयमा फर्किन थालेको छ। बजारमा व्यापारिक गतिविधि बढ्ने क्रमसमेत सुरु भएको छ।
यस वर्ष दशैंको अवधिमा मौसम खुलेका कारण उपत्यकाको दृश्य पनि आकर्षक देखिएको छ। घटस्थापनादेखि विजयादशमीसम्म अधिकांश दिन आकाश सफा रहँदा काठमाडौंका अग्ला भवन, सडक र वरपरका प्राकृतिक दृश्य खुलेर देखिएका छन्। नीलो आकाश र पृष्ठभूमिमा देखिने हिमशृङ्खलाले उपत्यकाको सौन्दर्य थप आकर्षक बनाएको छ।
दशैं मनाएर फर्किनेहरूको सङ्ख्या बढ्दै जाँदा काठमाडौं उपत्यकाले विस्तारै आफ्नो पुरानै व्यस्तता फर्काउँदै छ। चाडपर्वको बिदापछि कामकाज, यातायात र बजारका गतिविधि नियमित बन्दै जाँदा राजधानीको जनजीवन पनि सामान्य अवस्थामा फर्किने क्रममा छ।
Facebook Comments